جو آپ کا ہے شہ بحر و بر عقیدت سے

جو آپ کا ہے شہ بحر و بر عقیدت سے

اسی کو تکتے ہیں اہل نظر عقیدت سے

تمہی کو واجب حق مان کر عقیدت سے

ہر ایک چومتا ہے سنگ در عقیدت سے

خدا کی شان کو دیکھے ہیں دیکھنے والے

تمہیں رسول خدا دیکھ کر عقیدت سے

مقام زہد سے بڑھکر مقام نسبت ہے

نصیب ہوتی ہے نسبت مگر عقیدت سے

انہیں سے پوچھیے کیا ہے عطاے حب نبی

جو فیضیاب ہیں شام و سحر عقیدت سے

وہ رعب حسن کہ اٹھتی نہیں کسی کی نظر

رسول پاک کے پیش نظر عقیدت سے

نبی کے نقشِ قدم کیا ہیں یہ سمجھ کر ہی

شعور والے جھکاتے ہیں سر عقیدت سے

ذرا نبی کے وسیلے سے مانگ کر دیکھو

طلب سے بڑھ کے ملے گا مگر عقیدت سے

نصیرؔ واقعیٔ بیشک بڑی فضیلت ہے

درود بھیجنا سرکار پر عقیدت سے