یہاں محمد وہاں محمد ادھر محمد ادھر محمد

یہاں محمد وہاں محمد ادھر محمد ادھر محمد

جہاں بھی دیکھا نگاہ دل نے وہیں پہ آئے نظر محمد

اگر محبت سے کر دیں اپنی نگاہ معجز اثر محمد

خزاں کو رنگ بہار دے دیں خذف کو کر دیں گہر محمد

بشر یقیناً ہیں لیکن ایسے ہیں عالی منصب بشر محمد

زمین پر ہیں اور آسماں کی سنا رہے ہیں خبر محمد

ادب سے پلکیں بچھا رہی تھیں تمام رستے میں کہکشائیں

فضائے مریخ و مشتری میں ہوئے جو گرم سفر محمدؐ

نہ ان سے پوشیدہ عہد ماضی نہ دور مستقبل ان سے پنہاں

کھڑے ہیں نگران وقت بن کر فصیل ایام پر محمد

جو در پئے قتل تھے مسلسل انہیں بھی جاں کی امان بخشی

لہو کے پیاسے حریف پر بھی ہیں مہرباں کس قدر محمد

مرے یہ بے رنگ و نور مصرعے حقیقتاً کچھ نہیں ہیں لیکن

بنیں یہی زندگی کی پونجی قبول کر لیں اگر محمد

ڈبو دیں انگشت پاک اپنی تو کر دیں پانی کو آب کوثر

قدم سے خاک زمیں کو چھوکر بنا دیں اکسیر اثر محمد

کوئی بھی موسم ہو شاخ لب سے دعاؤں کے پھول جھڑ رہے ہیں

کریم ہیں کس قدر محمد رحیم ہیں کس قدر محمد

درود و کلمہ زبان پر ہوں سکون کی کیفیت ہو دل میں

ڈرائے جب جانکنی کی ساعت ہوں میرے پیش نظر محمد

کسی زمانے کے بیکسوں پر کبھی نہ ہجرت کی راہ کھلتی

دیر مکہ سے سوئے یثرب اگر نہ کرتے سفر محمد

جدھر سے ہوتا گزر نبی کا تمام رستہ مہکنے لگتا

اسی سے اصحاب جان جاتے گئے ہیں آخر کدھر محمد

امید کیا یہ یقیں ہے مجھ کو کہ حشر کے دن نہ ہوگی خواری

نہ جائیں گے جنت بریں میں نصیرؔ کو چھوڑ کر محمدؐ

ملائکہ جن کے در پہ آکر سلامیوں کے بکھیریں گوہر

خدا بھی جن پر درود بھیجے ہیں وہ مثالی بشر محمد

ہر اک زمانے میں رہنمائی کرے گی روشن حیات جس کی

نصیرؔ تاریخ وقت میں ہیں وہ منفرد راہ بر محمد