کیا شہر پر صفا ہے فرخندہ جائے یثرب

کیا شہر پر صفا ہے فرخندہ جائے یثرب

لائق ہے دو جہاں کو ہووے فدائے یثرب

جنت کی آرزو بھی اب دل سے اٹھ چکی ہے

کوئی ہوس نہیں ہے جی میں سوائے یثرب

یہاں کون پوچھتا ہے کسرا و جامِ جم کو

سلطانِ دو جہاں ہیں ہر یک گدائے یثرب

اعظم عبادتوں سے اپنے تو اب یہی ہے

ہر دم کیا کروں میں دل سے دعائے یثرب

دور از مدینہ ہوں میں بے زاد و راحلہ ہوں

مجھ کو نہ بھولیں دل سے اہل وفائے یثرب

ہے آرزو کروں میں آنکھوں میں جائے سرمہ

پاؤں جو میں الٰہی خاک شفائے یثرب

یا رب رہے سلامت تا دورۂ قیامت

ملجا یہ عاشقوں کا جنت فزائے یثرب

پہنچا تو نعمتیؔ کو تا روضۂ مقدس

یہ مدعا ہمارا برلا خدائے یثرب