تم سے برتر نہ ہوا اور کسی کا معراج

تم سے برتر نہ ہوا اور کسی کا معراج

فہم و ادراک سے باہر ہے تمہارا معراج

آرزو سے شبِ معراج کے خود افزوں تر

شرف پا بوس کی رکھے ہے تمنا معراج

لطف حق یار تمہارا رہے تا دور قیام

ہو ہر اک رات کو ہر رات سے بالا معراج

ذرہ افروزی سے معراج نبی کے امشب

از زمیں عرش تلک آج ہے سب کا معراج

ہے سزاوار کہ ہو حسن فدائے قامت

کہ اسی قد کے سبب حسن نے پایا معراج

کیا وہ معراج تھا کیا رات مبارک تھی وہ

ختم ہے ختم نبی پر شبِ اسرا معراج

نعمتیؔ مانگ دل و جاں سے ہر رات یہی

کہ نبی کو مرے ہر شب ہو خدایا معراج