مری ہر آن محبوب_الٰہی

مری ہر آن محبوب الٰہی

ترے قربان محبوب الٰہی

در عرفان باری کھولتا ہے

ترا عرفان محبوب الٰہی

عروج و اوج قدموں میں پڑے ہیں

یہ تیری شان محبوب الٰہی

جہان معرفت میں ہے نمایاں

ترا ایوان محبوب الٰہی

ولا کی مملکت ہے نام جن کے

ہیں وہ سلطان محبوب الٰہی

ہر اک مشکل مری تیرے کرم سے

ہوئی آسان محبوب الٰہی

مری حسرت علاؤالدین صابر

مرا ارمان محبوب الٰہی

تری چشم عطا رکھے ہمیشہ

ہمارا دھیان محبوب الٰہی

بنے مرضی خدائے آب و گل کی

ترا فرمان محبوب الٰہی

سجا ہے تیری مدحت کے گلوں سے

مرا دیوان محبوب الٰہی

تری سیرت میں جو کج ڈھونڈتے ہیں

وہ ہیں نادان محبوب الٰہی

تمہاری جنبش لب کھولتی ہے

در امکان محبوب الٰہی

مہ برج عطا و جود ٹھہرا

ترا دربان محبوب الٰہی

مثالی ہو امیران سخن میں

مری پہچان محبوب الٰہی

چلے آؤ کہ دل کی آرزو کا

تھمے طوفان محبوب الٰہی

حریم قرب میں ٹھہرایا جس کو

ہوا ذیشان محبوب الٰہی

نوازے نور کو ہر لمحہ ہر پل

ترا فیضان محبوب الٰہی