سنور جائے_گی سب کی عاقبت سب کا بھلا ہو_گا

سنور جائے گی سب کی عاقبت سب کا بھلا ہو گا

قیامت میں محمدؐ مصطفیٰؐ کا آسرا ہو گا

عدالت سے نبی کی جس کو پروانہ عطا ہوگا

وہی بس مستحق رحمت رب العلیٰ ہو گا

پکاریں گے شفیع المذنبیں کو سب قیامت میں

وہاں پر سب کا نعرہ یا محمدؐ مصطفیٰؐ ہو گا

ہماری خاک کے ذرے بھی پہنچیں گے وہاں اڑ کر

مدینے کی طلب ہوگی مدینہ مدعا ہو گا

نبی کا در ہے اور اقصائے عالم کی جبیں سائی

یہ منظر چشم قدرت سے خدا خود دیکھتا ہوگا

جو ان کے آستان پاک پر سر اپنا خم کر دے

وہ قسمت کا دھنی ہو گا سکندر وقت کا ہو گا

ابھی ذوق جنوں سوز دروں بخشا ہے حضرت نے

نصیرؔ ان کی محبت میں نہ جانے اور کیا ہو گا