چہرۂ_والشمس کا ہر دم نظارہ چاہیے

چہرۂ والشمس کا ہر دم نظارہ چاہیے

گیسوئے واللیل کا اس سر میں سودا چاہیے

خواہش دنیا نہیں ہے حب مولا چاہیے

آنکھ میں کعبہ رہے دل میں مدینہ چاہیے

دورئی ارض مدینہ میں ہے کیا عالم نہ پوچھ

زندگی نے کس قدر سونپے ہیں مجھ کو غم نہ پوچھ

آہ سوزاں نالۂ شبگیر چشم نم نہ پوچھ

آج تو یہ حال ہے کل ہوگا کیا ہمدم نہ پوچھ

کیا دکھاتی ہے میری تقدیر دیکھا چاہیے

کر دیا افشا رموز عشق نے راز دروں

کیوں نہ میں ایک بار اپنے آپ کو آواز دوں

اس سے بڑھ کر اور کیا ہوگا مرا حال زبوں

ہوش کی حد سے گزر کر کہتا ہے میرا جنوں

میں تماشائی بنوں عالم تماشا چاہیے

رحمتہ اللعالمیں کا اللہ اللہ وہ مقام

کرتا ہے خود خالق اکبر بھی جن کا احترام

پہلے بھیجے ہیں درود اور بعد میں اپنا پیام

عین بے ادبی ہے لینا نام آقا بے سلام

کملی والے کا ادب سے نام لینا چاہیے

جانتا ہے خوب تو اے راز وحدت کے امیں

میم کی چادر کو اوڑھے ہے کوئی پردہ نشیں

بات یہ عین الیقیں سے بن گئی حق الیقین

دیکھنا جلوہ کسی کا اس قدر آساں نہیں

جذبۂ منصور ہو یا ذوق موسیٰ چاہیے

پتلۂ خاکی عبث ہے خواہش نام و نمود

مٹنے والا ہے جہاں سے ایک دن تیرا وجود

ہے یہی اک باعث خوشنودی رب ودود

رات دن تو بھیج قیصرؔ نام آقا پر درود

ہونٹوں پہ صل علیٰ صَلْعَم وظیفہ چاہیے