حلال میکشی ہے اس میں کچھ کلام نہیں

حلال میکشی ہے اس میں کچھ کلام نہیں

شراب عشق محمد پیو حرام نہیں

ہے ایک صف میں کھڑے میکشان الا اللہ

نگاہ ساقی میں تخصیص خاص و عام نہیں

وہ کون سا ہے صحیفہ محمدؐ عربی

کہ جس میں ذکر تمہارا نہیں ہے نام نہیں

تھا اتنا پاس ادب شان سرور ذیشاں

پیام بھیجا خدا نے بجز سلام نہیں

حضور عرش پہ پہنچے تو طور پر موسیٰ

ہے بات راز کی اذن نظارہ عام نہیں

پڑا ہوں ارض مدینہ میں خوش ہوں اے رضواں

نہیں مجھے تیری جنت سے کوئی کام نہیں

زمیں سے عرش پہ پہنچا براق پل بھر میں

سواری اس سے کوئی بڑھ کے تیز گام نہیں

زبان خلق سے گونجی ہے یہ صدا قیصرؔ

کلام میں تیرے گنجائش کلام نہیں