ہے عشقِ محمد میں بیتاب جگر برسوں

ہے عشقِ محمد میں بیتاب جگر برسوں

دیدار کی حسرت میں روتی ہے نظر برسوں

تسکین کے اے آقا کچھ دن تو میسر ہوں

کاٹے ہیں مصیبت کے یہ شام و سحر برسوں

چوموں گا نگاہوں سے اس راہ گذر کو میں

رہتی ہے تصور میں جو راہ گذر برسوں

محروم ہوں منزل سے منزل کے تجسس میں

کہنےکو تو میں بھی ہوں سر گرم سفر برسوں

میں ہاتھ اٹھاتا ہوں آمین کہو تم بھی

یاد رہے دعا میری محروم اثر برسوں

اس گردش دوراں نے کچھ موڑ دیئے ایسے

منزل تھی کدھر میری گذرے ہیں کدھر برسوں

شمعِ رخِ احمد کا پروانہ ہوں پروانہ

پر وانہ کی خواہش میں جلتے رہے پر برسوں

دوری میں مدینے کی فرقت میں محمد کی

یہ شان کرم دیکھو ہوں سینہ سپر برسوں

اے رحمت عالم ہو رحمت کی نظر اب تو

محروم نظارہ ہیں یہ دیدۂ تر برسوں

ہے وجہ پریشانی ویرانئی دلِ آقا

آباد کسی دن ہوا اجڑا ہوا گھر برسوں

شیدائے محمد ہوں جنت میرا مسکن ہے

تو تاک میں تھی کس کی اے نار سقر برسوں

امید کے گلشن میں پھر تازہ بہار آئے

ہے نخلِ تمنا پھر بے برگ و ثمر برسوں

اک بار جو جھک جائے سنگِ درِ احمد پر

اٹھے گا نہ اے قیصر سر ہے میرا سر برسوں