جس دل میں رسول_عربی کے دیدار کی خواہش ہوتی ہے

جس دل میں رسول عربی کے دیدار کی خواہش ہوتی ہے

وہ دل بخدا دل ہے پر ہر وقت نوازش ہوتی ہے

دکھلا دے وہ بستی جس کے لیے دن رات نگاہ ترستی ہے

سنتا ہوں مدینے میں یا رب انوار کی بارش ہوتی ہے

رہتی ہے دعا لب پر ہر دم پہونچا دے مدینہ کر دے کرم

اب دیکھنا ہے کس روز میری منظور گزارش ہوتی ہے

کیا وصف بشر سے ہوگا ادا واصف ہے خود ان کا رب علا

قرآن کے پارے پارے میں وہ جن کی ستائش ہوتی ہے

جو مانگتا ہے وہ مانگتا ہوں میں پیارے نبی کے صدقے میں

بن جاتے ہیں بگڑے بخت سبھی مقبول سفارش ہوتی ہے

دنیا سے ہو کیا امید وفا دیکھا سمجھا سوچا پرکھا

مطلب کی پجاری ہے دنیا ہر گام پہ سازش ہوتی ہے

وہ سجدہ کہاں سجدہ جس میں شامل ہو خلوص دل قیصرؔ

دنیا ہے نمائش گاہ یہاں ہر شے میں نمائش ہوتی ہے