یہ انساں جن کے فیضان_کرم سے آج انساں ہے

یہ انساں جن کے فیضان کرم سے آج انساں ہے

انہیں کی مدحت و توصیف میرا دین و ایماں ہے

یہ دنیا یہ زمین و آسماں یہ چاند یہ تارے

غرض یہ ذرہ ذرہ آپ کا ممنون احساں ہے

وہ رتبہ آپ نے پایا کہ ہم رتبہ نہیں کوئی

جو برتر آپ سے ہے وہ فقط اک ذات یزداں ہے

زبان خلق ہے مداح وصف رحمت عالم

ثنا خواں آپ کا وہ بھی ہے جو محروم ایماں ہے

حیات پاک کا ایسا نمونہ آپ نے دیکھا

جو محشر تک برائے اتباع جن و انساں ہے

زہے قسمت جسے وابستگی ہے ان کے دامن سے

کہ وجہ سرفرازی دو عالم ان کا داماں ہے

زبان حضرت حسان بن ثابت خدایا دے

یہی اپنی تمنا ہے یہی اک دل میں ارماں ہے

قسیمؔ آساں نہیں نعت رسول پاک کہہ لینا

اسے آسان جو سمجھے سمجھتا ہوں وہ ناداں ہے

ثنا خوانی قسیمؔ بے نوا کیا کر سکے ان کی

خدائے قادر و قیوم جن کا خود ثنا خواں ہے