جو ذکرِ شاہِ شہیداں سنائے جاتے ہیں

جو ذکرِ شاہِ شہیداں سنائے جاتے ہیں

سلامی عرش کے پائے ہلائے جاتے ہیں

علی کے شیر فرس کو بڑھائے جاتے ہیں

زہے جلال کہ میداں پہ چھائے جاتے ہیں

تنِ حسین پہ ناوک چلائے جاتے ہیں

نشانِ حق کو نشانہ بنائے جاتے ہیں

جناب اکبرِ ذیشان ہیں کہ نورِ خدا

نظر میں دشمنوں کی بھی سمائے جاتے ہیں

گھرے جو نرغے میں اکبر تو بولے اہلِ حرم

عدو شبیہ پیمبر مٹائے جاتے ہیں

وہ جن کے صدقے میں آزاد ہوگی کل امّت

وہی اسیرِ سلاسل بنائے جاتے ہیں

ہے مہر، ذرّۂ خاکِ زمینِ کرب وبلا

یہ اَوج قصرِ امامت کے پائے جاتے ہیں

سرحسین جو دیکھا تو شامیوں نے کہا

لعین نیزے پہ قرآن اٹھائے جاتے ہیں

غمِ حسین کو ہم ضبط تو کریں قاتلؔ

مگر یہ آنکھوں میں آنسو جو آئے جاتے ہیں