قدرت نے آج اپنے جلوے دکھا دئے ہیں

قدرت نے آج اپنے جلوے دکھا دئے ہیں

آمد پہ مصطفیٰ کی پردے اٹھا دیے ہیں

یہ کون آ رہا ہے یہ آج کون آیا

سوئے ہوئے مقدر کس نے جگا دیے ہیں

جب ان کا نام لے کر مظلوم کوئی رویا

زنجیر توڑ دی ہے قیدی چھڑا دیے ہیں

بے کس نواز ان سا پیدا ہوا نہ ہوگا

بچھڑے ملا دئے ہیں اجڑے بسا دئے ہیں

بحر کرم میں ان کے اٹھی جو موج رحمت

مرتے بچا لیے ہیں گرتے اٹھا دئے ہیں

شاہوں کے در پہ جانا توہین تھی ہماری

ان کی گلی میں ہم نے بستر لگا دئے ہیں

سینے میں ہوں سجائے یادوں کی ایک محفل

ان کی لگن نے دل میں میلے لگا دئے ہیں

وہ جانیں اے نصیرؔ اب یا جانے ان کا خالق

ہم نے تو دل کے دکھڑے ان کو سنا دئے ہیں