راحت_جان_مبتلا سیدنا تمہیں تو ہو

راحت جان مبتلا سیدنا تمہیں تو ہو

صبر و سکون بے نوا سیدنا تمہیں تو ہو

مظہر حسن ذات ہو آئینہ صفات ہو

شان خدا بہر ادا سیدنا تمہیں تو ہو

لہر ہو بحر حسن کی موج ہو بہر عشق کی

ناز و نیاز مصطفیٰ سیدنا تمہیں تو ہو

دکھ بھرے دل کے چارہ ساز مرہم زخم جان ناز

درد مرے مری دوا سیدنا تمہیں تو ہو

تم ہو ہماری آرزو تم ہو ہماری جستجو

کشور حسن کے خدا سیدنا تمہیں تو ہو

رنگ مجاز میں بھی ہے حسن حقیقت آشکار

آئینۂ خدا نما سیدنا تمہیں تو ہو

ذات ہیں اس کی ہو کے گم تم نہیں اس طرح ہو تم

منزل حسن و رہنما سیدنا تمہیں تو ہو

ڈوب نہ جائے راہ میں رکھنا اسے نگاہ میں

کشتی دل کے نا خدا سیدنا تمہیں تو ہو

محمودؔ بینوا بھی ہے ذرۂ خاک نقش پا

اپنے گدا کا آسرا سیدنا تمہیں تو ہو