کب چھڑایا نہیں ہم کو غم سے کب مصیبت کو ٹالا نہیں ہے

کب چھڑایا نہیں ہم کو غم سے کب مصیبت کو ٹالا نہیں ہے

کب کڑی دھوپ میں مصطفیٰ نے سایہ کملی کا ڈالا نہیں ہے

ان کی رحمت کا کیا ہے ٹھکانا دیکھ لے سوئے طائف زمانہ

موسم سنگ باری میں لب پر کیا دعا کا اجالا نہیں ہے

لاج رکھی گئی ہر صدا کی دل نوازی ہوئی ہر گدا کی

ہے سخی ان کا دربار ایسا کسی سائل کو ٹالا نہیں ہے

گونج ان کی ثنا کی رہی ہے ہر نبی نے خبر ان کی دی ہے

کوئی ایسا صحیفہ نہیں ہے جس میں ان کا حوالہ نہیں ہے

لڑ کھڑاتا ہوا جب چلا ہوں بھیڑ نے راستہ دے دیا ہے

راہِ ہستی میں ان کے کرم نے کس جگہ پر سنبھالا نہیں ہے

ہے جہاں بھی حکومت خدا کی رحمتیں ہیں وہیں مصطفیٰ کی

سارے عالم ہیں چشم کرم میں کس جگہ کملی والا نہیں ہے

ان کی مدحت پہ مامور ہوں میں غیر کی مدح سے دور ہوں میں

فکر و فن کو صبیحؔ اپنے میں نے کبھی غزلوں میں ڈھالا نہیں ہے