عالم_علم_شریعت ہے بنی ہاشم کا چاند

عالم علم شریعت ہے بنی ہاشم کا چاند

عطر گلہائے طریقت ہے بنی ہاشم کا چاند

پیکر سادہ میں صناع حقیقی کا جمال

شاہکار دست قدرت ہے بنی ہاشم کا چاند

ناز جعفر شان حمزہ ثانی حیدر لقب

خسرو ملک شجاعت ہے بنی ہاشم کا چاند

جوہر شمشیر عریاں ضیغم دشت وغا

زور بازوئے امامت ہے بنی ہاشم کا چاند

لوح پیشانی وہی چشم و لب و عارض وہی

ہو بہو حیدر کی صورت ہے بنی ہاشم کا چاند

شعلہ عشق سراپا پیکر سوز تمام

قلب فطرت کی حرارت ہے بنی ہاشم کا چاند

ضد پہ آجاے تو طوفانوں کا سینہ چیر دے

نفس پیغمبر کی قوت ہے بنی ہاشم کا چاند

نکہت محسوس جس کی مستی جام ولا

وہ گل باغ ولایت ہے بنی ہاشم کا چاند

روز اول سے وفا والوں کی دنیا کا امام

روح ایمان محبت ہے بنی ہاشم کا چاند

دل کے آئینے جلا پاتے ہیں جس کی آب سے

وہ در بحر حقیقت ہے بنی ہاشم کا چاند

جس کی ہیبت کے دلوں پر عام سکے ہیں رواں

وہ تجلی جلالت ہے بنی ہاشم کا چاند

اک حسین ابن علی ابن طالب ہی کی کیا

کل بنی ہاشم کی عزت ہے بنی ہاشم کا چاند

اس کی چوکھٹ سے تہی داماں کوئی آتا نہیں

نازش اہل سخاوت ہے بنی ہاشم کا چاند

لب پہ یوں آتا ہے نام عباس کا اے آرزوؔ

جیسے اک پیغام رحمت ہے بنی ہاشم کا چاند