فنکار تھا، حاصل تھی، ہر فن سے شناسائی

فنکار تھا، حاصل تھی، ہر فن سے شناسائی

قدموں میں رہی اس کے ہر منزلِ دانائی

وہ بزمِ شریعت ہو، یا بزم طریقت ہو

ہر حال نمایاں تھی اس شخص کی گیرائی

اک عاشقِ صادق تھا اک رہبر کامل تھا

وہ مرد قلندر تھا، ہر علم کا شیدائی

ہندو ہو مسلماں ہو کس دل میں نہیں گونجی

اس ہند کے طوطی کی آواز کی شہنائی

اشعار سے پھیلایا پیغام ،محبت کا

موسیقی کے نغموں سے کی انجمن آرائی

دنیا سے گئے اس کو ، یوں سات صدی گذری

باقی ہے مگر اب تک اس کی وہی رعنائی

یہ عشق حقیقی کا اعجاز ہے خسرو نے

محبوب الٰہی کے قدموں میں جگہ پائی

اشعار نے خسروؔ کے عقدے کیے حل کیا کیا

جب بھی کبھی صوفیؔ پر دشوار گھڑی آئی