ہے میرا شبیر ساقی مے_کدہ ہے کربلا

ہے میرا شبیر ساقی مے کدہ ہے کربلا

یعنی عشق و معرفت کی درس گاہ ہے کربلا

خوف باطل کربلا کے ذکر سے مٹ جاتا ہے

اے مسلمانو ہمارا حوصلہ ہے کربلا

عشق کے ہر ایک پہلو کی یہاں تفصیل ہے

عشق کرنے والوں کی اک رہنما ہے کربلا

اس زمیں پر جذب ہیں مولیٰ کے سجدوں کے نشاں

باغ جنت کا مقدس آئنہ ہے کربلا

مر کے جینا کس کو کہتے ہیں یہاں سے سیکھئے

زندگی اور موت کا اک فلسفہ ہے کربلا

اہل دل تو برملا جنت ہی کہتے ہیں اسے

اس سے آگے بس خدا جانے کہ کیا ہے کربلا

حشر تک باقی رہے گی داستان کربلا

واسطے اسلام کے پاس وفا ہے کربلا

داستان کربلا باقی رہے گی حشر تک

آب رنگین بقا سے لکھ گیا ہے کربلا

اے امام کربلا سلمانؔ کی ہے آرزو

جیتے جی اک دن مجھے بھی دیکھنا ہے کربلا