عجب صلِّ علیٰ تاثیرِ عرفانِ محبت ہے

عجب صلِّ علیٰ تاثیرِ عرفانِ محبت ہے

کہ مجھ عاصی کےسر پہ سایۂ دامانِ رحمت ہے

وہ محبوب خدائے لم یزل مختارِ دوراں ہیں

رخِ پُرنور جن کا مطلعِ صبحِ سعادت ہے

نبی جتنے بھی آئے سب ہیں مشتاقِ کرم ان کے

وہ جن کی ہر ادا خود مظہرِ شانِ حقیقت ہے

گزر ہے عشق کی منزل میں کیفِ سوزِ پنہاں کا

وہی پیارا خدا کا ہے جسے اُن سے محبت ہے

مدینے کی فضاؤں پر ہو قرباں خُلد کی رونق

یہ وہ کوچہ ہے جس کا ذرہ ذرہ رشکِ جنت ہے

اسے معلوم کیا جو رازِ ہستی سے ہو بیگانہ

خمِ ابروئے جاناں کیا ہے محرابِ عبادت ہے

پلا دو شربتِ دیدار صدقے میں نواسوں کے

فقیرِ رہ گزر ستّار بیمارِ محبت ہے