شفیع_الوار کی ہے آج آمد آمد

شفیع الوار کی ہے آج آمد آمد

شہ انبیاء کی ہے آج آمد آمد

یہ غل آسماں پر ہے حور و ملک میں

حبیب خدا کی ہے آج آمد آمد

مؤدب ہیں استادہ حور و ملائک

شہ دوسرا کی ہے آج آمد آمد

ہوا جس کے باعث ظہور دو عالم

اسی پیشوا کی ہے آج آمد آمد

یہی حکم خالق سناتا ہے ہاتف

رسول خداؐ کی ہے آج آمد آمد

منور دو عالم ہوئے نور حق سے

امین الورا کی ہے آج آمد آمد

زمیں کو ہوا فخر عرش بریں پر

نبی العلا کی ہے آج آمد آمد

ملائک فلک سے ہیں آئے زمیں پر

شہ مصطفیٰ کی ہے آج آمد آمد

مزین ہوئی خط غفراں سے امت

کریم السجا کی ہے آج آمد آمد

سلامٌ سلامٌ ندا آ رہی ہے

کہ شمس الضحیٰ کی ہے آج آمد آمد

ہوا پاک ظلمت سے آفاق سارا

کہ بدرالدجیٰ کی ہے آج آمد آمد

پڑھو مومنین دل سے صل و سلم

کہ نور الہدیٰ کی ہے آج آمد آمد

یہ لازم ہے مخلصؔ تو کر جان قرباں

نبی الورا کی ہے آج آمد آمد