موجب_فخر_زمیں ہے بزم_میلاد_النبی

موجب فخر زمیں ہے بزم میلاد النبی

رشک فردوس بریں ہے بزم میلاد النبی

ہوتے ہیں خوش اہل ایماں سن کے آں حضرت کا ذکر

باعث احکام دیں ہے بزم میلاد النبی

بھاگتا ہے ذکر سے حضرت کے شیطاں دور دور

رغم شیطان لعیں ہے بزم میلاد النبی

دوست رکھتا ہے نبی کے ذکر کو بے شک خدا

مرضیٔ حق بالیقیں ہے بزم میلاد النبی

دین اور دنیا کے مقصد ملتے ہیں اس کے طفیل

مومنو حبل المتیں ہے بزم میلاد النبی

تاج عسر دیں و دنیا ہے یہ بزم پر ضیا

ملک ایماں کا نگیں ہے بزم میلاد النبی

کب گزر پائے بلا اس گھر میں ہوں جس میں یہ بزم

واہ کیا حصن حصیں ہے بزم میلاد النبی

ذکر پر حضرت کی ہے حور و ملک کی جاں فدا

حبذا اے کیا دل نشیں ہے بزم میلاد النبی

برکت ذکر رسول اللہ ہو کس سے بیاں

غمزدائے ہر حزیں ہے بزم میلاد النبی