مرا دل ہے خزینہ وصف_و_مدح_غوث_اعظم کا

مرا دل ہے خزینہ وصف و مدح غوث اعظم کا

مرا سینہ سفینہ ہے ثنائے قطب اکرم کا

تمامی اؤلیائے اولیں کا چھپ گیا جلوا

ترا شمس حکومت حکم حق سے جس گھڑی چمکا

قدم تیرا تمامی اولیا کی گردنوں پر ہے

نہیں ہے اس میں استثنا مؤخر کا مقدم کا

لیا جب نام نامی نام تک باقی نہیں رہتا

مصیبت کا تردد کا الم کا رنج کا غم کا

ملائک جبہہ سا ہوتے ہیں ہر صبح و مسا آ کر

بیاں کیا وصف ہو مجھ سے ترے باب معظم کا

ہر چاہے تو اک دم میں گدا کو شاہ فرما دے

خدا کے فضل سے مختار ہے تو سارے عالم کا

ترے در کے فقیروں کے قدم پر سر جھکا ہر دم

شہان دہر کا خاقان کا فغفور کا جم کا

نہیں کس دل میں نور افگن تجلی آپ کے رخ کی

نہیں کس سر میں سودا آپ کے گیسوئے پر خم کا

مشرف کیجیے دیدار پر انوار سے اپنے

کہ اک مدت سے ہے ارماں یہ میری چشم پر نم کا

فقیرؔ قادری کو کچھ سوا اس کے نہیں آتا

ترا نام مبارک ہے وظیفہ میرا ہر دم کا