کیا انتشار اب ہمیں رد_و_قبول کا

کیا انتشار اب ہمیں رد و قبول کا

دامن ہے اپنے ہاتھ میں آل رسول کا

جلوہ دعا میں ہے جو یہ حسن قبول کا

نالہ ہوا بلند کسی دل ملول کا

اللہ اور اس کا حبیب ایک ہی تو ہیں

مطلب کھلا ہوا ہے اطیعوالرسول کا

قرآن بھی زبان نبی ہے حدیث بھی

جو حکم ہے خدا کا وہی ہے رسول کا

پہلے ہے جذب اور سلوک اس کے بعد ہے

یہ راستہ عروج کا ہے وہ نزول کا

اکبرؔ زبان پر نہیں آتا جو دل میں ہے

پابند ہوں ضوابط اہل اصول کا