اوصاف محمد کے ترانے ہیں سخن میں

اوصاف محمد کے ترانے ہیں سخن میں

قرطاس پہ خامہ ہے کہ بلبل ہے چمن میں

اوصاف براق شہ دیں ہو نہیں سکتے

اک برق تھی جو کوند گئی چرخ کہن میں

ہے کیا عجب آنکھوں میں بیٹھائیں مجھے حوریں

جل پِس کے ہوا سرمہ محبت کی جلن میں

پھر عشق گھلا دے گا مجھے شمع کی صورت

پھونکا ہے جگر آگ لگا دی ہے بدن میں

اشکوں میں ٹپکتے ہیں شرر سوزش غم سے

لو آگ برسنے لگی بھادوں کی بھرن میں

نعلین کے موتی ہیں بنے گوہر انجم

زینت ترے قدموں سے ہوئی چرخِ کہن میں

ہے اس گلِ وحدت کے پسینے سے محبت

اس عطر کا شیشہ ہے مرے رکھ دینا کفن میں

یہ رنگ یہ انداز یہ آواز تو اکبرؔ

طوطی ہے کہ قمری ہے کہ بلبل ہے چمن میں