لایا تمہارے پاس ہوں یا پیر الغیاث

لایا تمہارے پاس ہوں یا پیر الغیاث

کر آہ کے قلم سے میں تحریر الغیاث

لاہوت سے اتر کے ہوں ناسوت میں پڑا

کیا کچھ ہوئی مقام کی تغیر الغیاث

حرص و ہوائے نفس ہے زنجیر پائے دل

پاتا نہیں نجات کی تدبیر الغیاث

سوز و گداز واہ و تپش نالہ و فغاں

سب کچھ ہوئے ولے نہیں تاثیر الغیاث

عاجز ہوں اور بیکس و ناچار و ناتواں

مضمون آہ دل کی ہے تفسیر الغیاث

ہیں آپ کے کھاتے ہیں یا پیر دستگیر

سن لو مرید اپنے کی یا پیر الغیاث

مشکل کشائے خلق ہو تم شاہ اولیاء

ہے اس لیے تمہاری قفا گیر الغیاث

کرتے ہو مشکلات جہاں ایک پل میں حل

کیوں حق میں میرے اتنی ہے تاخیر الغیاث

گر سن کے الغیاث نیازؔ آپ داد دیں

دنیا و دیں میں پاتی ہے توقیر الغیاث

یا غوث اعظم آپ سوا کون ہے مرا

کس کے کنے میں جا کروں تقریر الغیاث

دیکھو تو میں نیازؔ ہوں لے سر سے پاؤں تک

یا ہوں میں الغیاث کی تصویر الغیاث