مومن ہی کے دل میں نہیں سودائے محمد

مومن ہی کے دل میں نہیں سودائے محمد

ہر دل ہے فدائے رخِ زیبائے محمد

موجود مرے دل میں رہے اس کی عقیدت

لطف اتنا مرے حال پہ فرمائے محمد

کچھ عابد وزاہد ہی پہ موقوف نہیں ہے

ہر صاحب ایمان ہے شیدائے محمد

کیوں ارض وسما ہو نہ ضیاؤں سے منور

ہے نور الٰہی رخِ زیبائے محمد

کوئی بھی نہیں اس سے سوا زہد و عبادت

مل جائے جبیں سائی کو گرپائے محمد

تسکیں کے لیے رب سے شمیم اپنی دعا ہے

مجھ کو دمِ آخر نظر آجائے محمد