وہ نکلا جس گھڑی غارِ حرا سے

وہ نکلا جس گھڑی غارِ حرا سے

چمک اٹھا جہاں اس کی ضیا سے

نہ پوچھو طلعتِ روئے منور

جہاں میں روشنی ہے نقشِ پا سے

ملے گی ہر اذیت سے رہائی

کوئی سیکھے ازل کے رہنما سے

تری گفتار پُر تاثیر ہوگی

اگر آغاز ہو صلِ علیٰ سے

محبت ہے اگر محبوبِ رب سے

تو پھر بچ جائو گے رب کی سزا سے

ہے عزت رب کے ہاں ذکرِ نبی سے

ملے کیا خاک لوگوں کی ثنا سے

سبھی شاہوں کو میرا مشورہ ہے

نہ ٹکرانا کبھی ان کے گدا سے

ترے عشاق نے تو جب بھی مانگا

تری چاہت ہی مانگی ہے خدا سے

شکیلؔ اک ذرۂ بے آبرو تھا

بھرا کاسہ ہے اب ان کی عطا سے