کہوں کیا رتبہ اعلیٰ علاؤالدین صابر کا

کہوں کیا رتبہ اعلیٰ علاؤالدین صابر کا

جسے دیکھا ہے متوالا علاؤالدین صابر کا

چلو اے تشنگانِ معرفت سیراب ہو چل کر

رواں ہے فیض کا دریا علاؤالدین صابر کا

نہیں خواہش تری جنت کی اے رضواں نہ حسرت ہے

مجھے کافی ہے دروازہ علاؤالدین صابر کا

کہوں گا ساقیٔ کوثر سے ہو جاؤں ترے قرباں

مجھے بھی کچھ ملے صدقہ علاؤالدین صابر کا

تمنا ہے فرشتوں کو کہ چو میں آن کر چوکھٹ

درِ خالق ہے دروازہ علاؤالدین صابر کا

تصدق اپنے مرشد کے کہ جس نے ہم کو دکھلایا

جمالِ عارضِ زیبا علاؤالدین صابر کا

غلام خاک پا ہوں میں معین الدین و قطب الدین

فریدالدین بابا کا علاؤالدین صابر کا

تجھے اے عشق صد رحمت، عفاک اللہ جزاک اللہ

مجھے تو نے کیا شیدا علاؤالدین صابر کا

کھلے کیوں کر حقیقت ذات کی بندہ پہ سوچو تو

خدا جانے ہے خود رتبہ علاؤالدین صابر کا

نکیرین آ کے گر پوچھیں مرے ایمان و ملت کو

کہوں فوراً کہ ہوں بندہ علاؤالدین صابر کا

کوئی کچھ بھی کہے پر ہے غلام خاص شمس الدین

محی الدین قادر کا علاؤالدین صابر کا