ہو نہ توفیق گر ندامت کی

ہو نہ توفیق گر ندامت کی

بارشیں بھی نہ ہوں گی رحمت کی

خود کو بازاری کر دیا لیکن

بھوک پھر بھی مٹی نہ شہرت کی

رحمتوں سے ہوا ہے گھر روشن

رات رو رو کے جب تلاوت کی

رزق محنت کا لے کے گھر پہنچا

دی دعا راستوں نے برکت کی

آسمانوں پہ چھا گئے بادل

پیاس ہم کو لگی ہے شدت کی

شاعری درس ہے محبت کا

نہیں گنجائش اس میں نفرت کی

اس کو عزت عطا کی اللہ نے

جس نے چھوٹے بڑے کی عزت کی

پر لگائے ہوا نے اے اصفیؔ

جب بھی اڑنے کی میں نے نیت کی