باغ_عالم کو ملا رنگ_بہاراں تجھ سے

باغ عالم کو ملا رنگ بہاراں تجھ سے

بزم-ہستی کا ہوا حسن نمایاں تجھ سے

سر بلند اور ہوا دہر میں آدم کا وقار

ارجمند اور ہوئی عظمت انساں تجھ سے

وہ تگ و تاز کہ دی تیزئ دوراں کو شکست

وہ تب و تاب کہ سایہ تھا گریزاں تجھ سے

خفت عجز سے کفر اور نگوں سار ہوا

استوار اور ہوئی سطوت ایماں تجھ سے

تجھ سے تاریک فضاؤں کو ملی کسوت نور

عظمت شام بنی صبح درخشاں تجھ سے

نا توانوں نے توانائی کی ہمت پائی

درد مندوں کو ملا درد کا درماں تجھ سے

وسعت جود و سخا دیکھ کے تیرا سائل

تھا تنک ظرفئ دامن پہ پشیماں تجھ سے