شفائے امراضِ قلب بے جاں بنام حضرت قیام اصدق

شفائے امراضِ قلب بے جاں بنام حضرت قیام اصدق

دوائے دردِ دل پریشان کلام حضرت قیام اصدق

قبول کر لے وہ جانِ عالم تو پھر اسے ہو جہاں میں کیا غم

نہ ہو وہ رتبے میں شاہ سے کم غلام حضرت قیام اصدق

جنہوں نے حضر ت سے کی ہے بیعت ملی انہیں دو جہاں کی نعمت

ہوئے وہ سب سے بلند رتبت غلام حضرت قیام اصدق

زباں نے دل سے مزہ جو پایا دہن کے بوسوں سے لطف اٹھایا

مری زباں سے لبوں تک آیا جو نام حضرت قیام اصدق

جنہیں ہے قرب خدائے اکبر مراتب ان کے ہیں سب سے برتر

سمجھ کہ ہے عرش سے بھی اوپر مقام حضرت قیام اصدق

یہی دعا ہے یہی تمنا رہے سخنؔ پر ہمیشہ سایہ

الٰہی ہوتا قیامِ دنیا قیام حضرت قیام اصدق