اللہ اللہ میری قسمت ایسا رتبہ اور میں

اللہ اللہ میری قسمت ایسا رتبہ اور میں

جاگتی آنکھوں سے دیکھوں خوابِ طیبہ اور میں

دم بخود ہیں آج دونوں، میری دنیا اور میں

بارگاهِ صاحبِ یٰسین و طہ اور میں

آج ان آنکھوں کو بینائی کا حاصل مل گیا

روبرو ہے گنبدِ خضرا کا جلوہ اور میں

آپ کی چشمِ کرم کا میں نے دیکھا معجزہ

آپ کے روضے کی جالی میرے آقا اور میں

آپ ہی چاہیں تو رکھ لیں آبرو ورنہ حضور

اپنے منہ سے آپ کی نسبت کا دعویٰ اور میں

مجھ کو اذنِ باریابی اور اس انداز سے

آپ پہ قرباں میرے اجداد و آبا اور میں

میں جہاں پر ہوں وہاں محسوس ہوتا ہے سرورؔ

جیسے پیچھے رہ گئے ہوں، میری دنیا اور میں