جب آیا کربلا میں وہ سلطانِ کربلا

جب آیا کربلا میں وہ سلطانِ کربلا

مجرائی باغ بن گیا میدانِ کربلا

رستم کا دیکھ کر جگر و دل نکل پڑے

پھرتے تھے اس غضب سے شجاعانِ کربلا

وقتِ شہادت، خلفِ حضرت نبی

روتے تھے زار زار، درختانِ کربلا

شدت عطش کی، تیزی خورشید و ریگ گرم

تھا یادگارِ حشر، بیابانِ کربلا

کہتے تھے نابکار شہِ دیں کو دیکھ کر

تو چند روز ہے یہاں مہمانِ کربلا

فرمایا تم رہو گے جہنم میں تا ابد

میں حشر تک رہوں گا نگہبانِ کربلا

لاشوں پہ سر دھرے ہوئے چالیس روز تک

حافظ تھے جان و دل سے درندانِ کربلا

دیکھے اگر تو غور و تامل سے کشف ہو

ہر دم ہے تری ذات میں سامانِ کربلا

شوخئی چشم دیکھ کے اکبر کی ہر زماں

پھرتے تھے ساتھ ساتھ غزالانِ کربلا

سیدؔ یہ آرزو ہے خدائے بزرگ سے

دکھلا دے مجھ کو گنجِ شہیدانِ کربلا