غوثِ اعظم ہیں امام، خاندانِ قادری

غوثِ اعظم ہیں امام، خاندانِ قادری

خوب باندھا انتظام، خاندانِ قادری

کچھ نہیں ہے انتہا اس قصر رنگا رنگ کی

آسماں ہے ایک بام، خاندانِ قادری

نشۂ وحدت سے تا محشر کہاں اس کو فراغ

پی گیا جو ایک جام، خاندانِ قادری

تا ابد ہوتے رہیں گے صاحبانِ دیں شکار

اس قدر پھیلا ہے دام، خاندانِ قادری

جان و مال اپنا اگر قرباں کروں بیشک روا

کیا ہی متفقہ ہے نام، خاندانِ قادری

چاہیے گر تجھ کو سیدؔ وصلِ ذاتِ حقِ مدام

صدق دل سے ہو غلام، خاندانِ قادری