وجہ_رب_کبریا وہ حق_نما آنے کو ہے

وجہ رب کبریا وہ حق نما آنے کو ہے

عین نفس مصطفیٰ دست خدا آنے کو ہے

اب شراب معرفت تقسیم ہوگی برملا

مے کدہ کعبہ بنا ساقی مرا آنے کو ہے

تاج دار ھل اتیٰ بھی انما کی شان بھی

مظہر شمس الضحیٰ بدرالدجیٰ آنے کو ہے

حق علی کے ساتھ ہے یعنی علی ہیں اس کے ساتھ

راہ حق ہم کو دکھانے رہنما آنے کو ہے

اب بھریں گی جھولیاں ہر بے کس و نادار کی

معدن جود و سخا لطف و عطا آنے کو ہے

بولتا قرآن ہیں ناموس کعبہ ہیں وہی

عزت دین نبی شان خدا آنے کو ہے

نیر برج امامت قبلۂ کونین اور

گوہر تاج شرف باب ولا آنے کو ہے

اب مٹیں گے رنج و کلفت اور مرے آلام سب

دور ہوں گی مشکلیں مشکل کشا آنے کو ہے

نسبت وارث علی کے فیض کا دیکھو اثرؔ

تیری بخشش کو کرم کا سلسلہ آنے کو ہے