نیزے پہ تھا جب دلبرِ کرار کا چہرہ

نیزے پہ تھا جب دلبرِ کرار کا چہرہ

تھا مثلِ قمر شاہ کے سالار کا چہرہ

ہاں چہرۂ شبیر وہ چہرہ تھا کہ جس میں

آتا تھا نظر احمدِ مختار کا چہرہ

خود لینے اترتے تھے ملائک بھی بلائیں

کچھ ایسا تھا شبّیر کے انصار کا چہرہ

وہ رعب تھا خطبے کی جلالت میں علی کا

تھا مثلِ علی عابدِ بیمار کا چہرہ

اکبر کی شہادت پہ کہا سبطِ نبی نے

ڈوبا ہے لہو میں شہِ ابرار کا چہرہ

اک تیری بقا کے لیے اے دینِ خدا بس

شبیر نے دیکھا نہیں گھر بار کا چہرہ

محشر میں لگائیں گے اسے شاہ گلے سے

دیکھیں گے وہ جب اپنے عزادار کا چہرہ

پہلے سے بھی آتا ہے نظر اور حسیں تر

با وقتِ نزع شہ کے پرستار کا چہرہ

وہ بھی اے حسنؔ لائی گئیں تھی سرِ بازار

دیکھا نہ تھا جس نے کبھی بازار کا چہرہ