قید میں بھی شوکت_نام_و_نسب زینب میں ہے

قید میں بھی شوکت نام و نسب زینب میں ہے

جو ہے اہل بیت کی پہچان سب زینب میں ہے

اہل غم ہو جاتے ہیں آ کر جہاں شکوہ بہ لب

اس جگہ بھی انتہائے شکر رب زینب میں ہے

زہد‌ و تقویٰ استقامت صبر و استقلال کی

مرحبا خیرالنسا جیسی ہی چھب زینب میں ہے

اللہ اللہ ثانیٔ زہرا کا پایا ہے لقب

عزت و توقیر کا ہر اک سبب زینب میں ہے

بھائی کی عظمت پہ بیٹے بھی نچھاور کر دیے

جذبۂ ایثار و قربانی عجب زینب میں ہے

بات جب بھی نکلے گی دی جائے گی اس کی مثال

وہ مثالی جوہر علم و ادب زینب میں ہے

دولت کونین سے طاہرؔ کہاں رغبت انہیں

بس رضائے حق تعالیٰ کی طلب زینب میں ہے