صاحب لولاک وجہ گردش ایام ہے

صاحب لولاک وجہ گردش ایام ہے

اس کی زلف و رخ کا صدقہ حسن صبح و شام ہے

آپ ہی کی شان میں ہے آیتِ لا تقنطوا

موجزن رحمت کا یہ دریائے فیض عام ہے

اسوۂ حسنا ہے اس آئینۂ کردار میں

زندگی سچ پوچھیے تو بندگی کا نام ہے

ننگِ اوصاف بشر ہے افتخارِ رنگ و نسل

پیکرِ مجد و شرف کا آخری پیغام ہے

مطمئن ہے قلب مضطر ذکر الا اللہ سے

روح کی تسکین میرے مصطفیٰ کا نام ہے

ہے مکمل دین ان کا کیوں نہ ہوں ختم رسل

نعمت رب کا انہیں کی ذات پر اتمام ہے

اک نگاہ لطف شاہا برؔق پر فرمائیے

یہ گرفتار معاصی بندۂ بے دام ہے