مری نظر میں ہے روضہ ترا غریب_نواز

مری نظر میں ہے روضہ ترا غریب نواز

نگاہ شوق ہے قبلہ نما غریب نواز

ترا وجود ہے جان بہار گلشن چشت

تجھی سے نکہت ہر گل ہے یا غریب نواز

رسولؐ حق کی عطا اور تم عطائے رسول

جو تم ملے تو سبھی کچھ ملا غریب نواز

تمہارے در سے ہزاروں غریب پلتے ہیں

تمہارے کوچے کی ساری فضا غریب نواز

تمہارا درد ہے سرمایۂ حیات مرا

خدا کرے کہ یہ ہو لا دوا غریب نواز

بحق خواجۂ عثماں ادھر بھی چشم کرم

تمہارے در کا ہوں میں بھی گدا غریب نواز

سمجھ میں آئے گا امداد کیسے ہوتی ہے

ذرا تڑپ کے پکارو تو یا غریب نواز

ضیا ہیں شمع رسالت کی نام کچھ بھی سہی

مجھے تو ایک ہیں غوث الوریٰ غریب نواز

حضورؐ آپ کا ایسا بھی اک غلام سہی

نباہ دیکھیے کاملؔ کو یا غریب نواز