اے بے_نیاز_مالک مالک ہے نام تیرا

اے بے نیاز مالک مالک ہے نام تیرا

مجھ کو ہے ناز تجھ پر میں ہوں غلام تیرا

ہو شوق مرتے دم بھی اے خوش خرام تیرا

آنکھوں میں دم ہو اپنا لب پر ہو نام تیرا

میں ہوں ضعیف بندہ تو مالک قوی ہے

عصیاں ہے فعل میرا بخشش ہے کام تیرا

ہر مرغ باغ تیری تسبیح پڑھ رہا ہے

ہر برگ کی زباں سے سنتا ہوں نام تیرا

کیوں کر ہو شکر ہم سے تیری عنایتوں کا

تیرا رسول لایا ہم تک پیام تیرا

ہوگا بڑے بڑوں کا ہنگامہ روز محشر

اکبرؔ قبول ہو گا کیوں کر سلام تیرا