تمہاری ذات ہے وہ پاک ذات یا_وارث

تمہاری ذات ہے وہ پاک ذات یا وارث

کہ جس میں سب ہیں خدا کی صفات یا وارث

تمہارا ہاتھ نبیؐ کا ہے ہاتھ یا وارث

تمہاری ذات علی کی ہے ذات یا وارث

کچھ ایسا لگتا ہے اک تیرے ساتھ رہنے سے

کہ جیسے ساری خدائی ہے ساتھ یا وارث

بھٹک رہا تھا سر راہ کاروان حیات

دکھائی تم نے ہی راہ نجات یا وارث

سر نیاز جھکا کر سلام کرتی ہے

دل و نگاہ کی کل کائنات یا وارث

امیدوار ہے اعجازؔ رحمت کا

ادھر بھی ہو نگاہ التفات یا وارث