تو نور_رب_العالمیں آفاق میں شہرہ ترا

تو نور رب العالمیں آفاق میں شہرہ ترا

آئینہ ہے کہ چاند ہے مصحف ہے کہ چہرہ ترا

یاسین ہیں دنداں ترے طہٰ قد زیبا ترا

والشمس چہرے کی چمک والنجم نقش پا ترا

لعل یمن در عدن مشک ختن حسن چمن

اترن ہے تیرے حسن کی وارن ہے یا صدقہ ترا

حور و ملائک دیکھ کے حیرت زدہ سے رہ گئے

کہنے لگے یہ کون ہے رب نے کہا آقا ترا

قانون رب منشور حق آداب دل دستور جاں

گویا نصاب عشق ہے وہ آخری خطبہ ترا

چاہت تری رب کی رضا چاہے مگر تیرا خدا

تیری خوشی خواہش تری مرضی تری منشا ترا

تو مالک کونین ہے تو حاصل دارین ہے

ٹوٹے دلوں کا چین ہے ہر لفظ ہر جملہ ترا

پوچھیں جو وہ تو کون ہے خم کر کے سر کہنا ضیاؔ

شاعر ترا منگتا ترا خادم ترا بندہ ترا