وہ نور_خدا ہے جلوہ_نما کس شان سے اپنے پیاروں میں

وہ نور خدا ہے جلوہ نما کس شان سے اپنے پیاروں میں

سورج ہے چمکتے ذروں میں یا چاند ہے روشن تاروں میں

حیرت ہے جن کو مدح نبیؐ آئی نہ کتاب حق میں نظر

ہم کو تو ملی نعت احمدؐ قرآن کے تیسوں پاروں میں

کیا کہیے رخ و دنداں کی چمک ادنیٰ سی نظر آتی ہے جھلک

کچھ دن کو چمکتے سورج میں کچھ رات کے روشن تاروں میں

بوبکر و عمر عثمان و علی سو جان سے تھے شیدائے نبیؐ

تھی ایک تڑپ ان چاروں میں تھی ایک چمک ان تاروں میں

اس سرور دیں پر جان فدا کی جس نے نماز عشق ادا

تلواروں کی جھنکاروں میں اور تیروں کی بوچھاروں میں

گو مست مئے الفت ہوں مگر مذہب کا بھی ہے احساس عمرؔ

دیوانہ بھی ہوں دیوانوں میں ہشیار بھی ہوں ہشیاروں میں