نزول رحمت حق ہے چلے ہاں دور پیمانہ

نزول رحمت حق ہے چلے ہاں دور پیمانہ

گھٹا چھائی کھلا ہے ساقی کوثر کا میخانہ

ادھر پائے نگاہ شوق میں لغزش ہوئی پیدا

ادھر جنبش میں آیا وہ حریم ناز جانانہ

یہ کس کا جلوۂ رنگیں ہے رقصاں آج کعبہ میں

کہ ہر ذرۂ زمیں کا ہو رہا ہے عرش کا شانہ

ولی حق وصی مصطفیٰ کی آمد آمد ہے

متاع دو جہاں جس کی محبت کا ہے بیعانہ

کسی کے آستاں کی جبہ سائی تو نہ چھوٹے گی

حرم چھٹ جائے مجھ سے اس میں یا چھٹ جائے میخانہ

تصدق وارثیؔ سو جان سے اس نام نامی پر

کہ ظلمت خانۂ دل جس کے دم سے ہے خداخانہ