تخیل سے ورا ہے عز_و_جاہ_مفتیٔ_اعظم

تخیل سے ورا ہے عز و جاہ مفتیٔ اعظم

نشان اوج و رفعت ہے کلاہ مفتیٔ اعظم

سلوک و معرفت کی ساری منزل طے کراتی ہے

تصوف کی ڈگر ہے شاہ راہ مفتیٔ اعظم

عقیدت کیش کا تانتا بندھا رہتا ہے ہر لمحہ

ہے جائے خیر و برکت خانقاہ مفتیٔ اعظم

ہے گزری زندگی سرکار کی سنت کے سانچے میں

بتاتی ہے یہی شام و پگاہ مفتیٔ اعظم

برائے حفظ ناموس حبیب خالق اکبر

کمر بستہ ہمیشہ ہے سپاہ مفتیٔ اعظم

یکا یک دور ہو جائے درون دل کی ویرانی

کبھی پڑ جائے جو نور نگاہ مفتیٔ اعظم

یہاں آٹھوں پہر سجتی ہے اہل عشق کی محفل

محبت کا حرم ہے بارگاہ مفتیٔ اعظم

اسے محشر میں بھی مل جائے گی جائے اماں واصفؔ

جسے حاصل ہے دنیا میں پناہ مفتیٔ اعظم