بگڑی ہوئی میری قسمت کی ہر بات بدلنے والی ہے

بگڑی ہوئی میری قسمت کی ہر بات بدلنے والی ہے

ٹھہرے ہوئے آنسو کہتے ہیں برسات بدلنے والی ہے

والشمس کے روئے تاباں سے واللّیل کی زلفِ پیچاں سے

یہ صبح بدلنے والی ہے یہ رات بدلنے والی ہے

بہتے ہوئے آنسو کچھ کم ہیں آہوں کے شرر بھی مدّھم ہیں

کچھ اور غمِ دل تیرے لئے سوغات بدلنے والی ہے

سرکار ہمیں بلوائیں گے ہم ہند سے طیبہ جائیں گے

اے حسنِ تجسس اب راہِ ظلمات بدلنے والی ہے

تکمیلِ محبت ہونی ہےاک حسنِ مجسّم کے در سے

اے جوشِ جنوں اب تصویرِ جذبات بدلنے والی ہے

آتے ہیں مدینے کے جھونکے پیغامِ مسّرت لےلے کر

ناکامِ کرم یہ تعمیرِ صدمات بدلنے والی ہے

دیکھیں گے مدینہ دیکھیں گے مرنے کے لیے ہم تڑپیں گے

کچھ دیر نہیں اب تشکیلِ جذبات بدلنے والی ہے

دنیائے محبّت میں واصفؔ ہر ایک طرف ہے سنّاٹا

اب دل کو یقیں ہے تشکیلِ جذبات بدلنے والی ہے