اپنے مستوں کو مئے ناب پلا دے ساقی

اپنے مستوں کو مئے ناب پلا دے ساقی

تشنہ لب بیٹھے ہیں سرشار بنا دے ساقی

خُم کے خُم بزم میں ہاں آج بہادے ساقی

کوئی پیاسا نہ رہے سب کو چھکا دے ساقی

ابرِ رحمت کی گھٹا چاروں طرف چھائی ہے

باغِ عالم میں نئے سر سے بہار آئی ہے

شور ہر سمت ہے اے ہجر کے مارے اٹھو

اب خدا کے لیے کلفت کے سنوارے اٹھو

شاد ہو پھر گئے دن آج تمہارے اٹھو

جلوہ گر ہوگئے قسمت کے ستارے اٹھو

خوش ہیں سب اہلِ چمن عید ہے گلزاروں میں

بلبلیں پھول لیے پھرتی ہیں منقاروں میں

لوٹ کر کردیا تھا جن کو خزاں نے پامال

جن کی صورت سے ٹپکتا تھا کبھی حزن وملال

فصلِ گل دیکھ کے سب شاد ہیں پروانہ مثال

مسکراتا ہے کوئی اور ہے کوئی دل میں نہال

بلبلیں بازؤں سے سایہ کئے بیٹھی ہیں

گل کو آغوشِ محبت میں لیے بیٹھی ہیں

ساقیا دیکھ سخاوت کا زمانہ آیا

ہر طرف خیر کا برکت کا زمانہ آیا

ہو مبارک تجھے فرحت کا زمانہ آیا

یعنی اب ساغرِ عشرت کا زمانہ آیا

سبز اطلس کے دو شالوں میں شجر ہیں طاؤس

صحنِ گلزار میں ہر سمت میں رقصاں طاؤس

صحن گلزار میں اشجار سے گرتے ہیں ثمر

سرخ پھولوں میں عجب قسم کا پنہاں ہے اثر

سبز پتوں پہ جھلکتے ہیں ہر اک سمت شجر

سبز مخمل کا بچھا ،فرش ہے تاحدِّ نظر

کچھ سے کچھ اور ہوئی روئے زمیں کی صورت

بس گئی سطحِ زمیں خلدِ بریں کی صورت

باغِ عالم میں کچھ اس طرح فضا چھائی ہے

ساقیا آج ہر اک محوِ تماشائی ہے

اپنے ہی جلوے کا ہر ایک تمنائی ہے

خود تماشا بنا ہے خود ہی تماشائی ہے

بوئے گل پھیلی ہے ہر سمت گذرنے کے لیے

زلفِ سنبل ہے پریشان سنور نے کے لیے

دل میں سب کہتے ہیں مرغانِ خوش الحانِ چمن

کچھ کا کچھ ہوگیا اک آن میں عنوانِ چمن

گل کھلے ایسے ہوئے زیب چمن جانِ چمن

باتوں باتوں میں بھرا پھولوں سے دامانِ چمن

نشۂ عشق سے سب اہلِ چمن ہیں مدہوش

چشمِ نرگس ہمہ تن دید ہے گل ہیں خاموش

بے سبب ہوتے ہیں عیش کے ساماں ہر سو

کچھ سبب ہی سے تو ہوتا ہے چراغاں ہر سو

آج مسرور جو ہے عالمِ امکاں ہر سو

میں بتاؤں تجھے کیوں لوگ ہیں خنداں ہر سو

فرض اسلام میں ہے جس کی محبت ساقی

لا پلا آج اُسی کی ہے ولادت ساقی

وہ علی لشکرِ کفّار تھا جس سے برہم

وہ علی کا سرِ اصنام خدا کا ضیغم

وہ علی طالبِ حق بے طلبِ جاہ وحشم

وہ علی شق ہوئی جس کے لیےدیوارِ حرم

وہ علی جس کو خدا نے کہا اپنی شمشیر

آج کعبے کے غلافوں میں وہ چمکی شمشیر

وہ علی شیرِ خدا شاہِ ولایت ساقی

وہ علی رہبرِ دیں حامیٔ امت ساقی

جس سے حضرت کو تھی اس درجہ محبت ساقی

اپنے بستر پہ سلایا شبِ ہجرت ساقی

وہ علی جس کی ثنا دینِ محمد میں ہوئی

وہ علی حق نے بنایا جسے بازوئے نبی

سُن کے ساقی نے بصد ناز و عقیدت یہ کہا

مرحبا مرحبا اے شیرِ خدا شیرِ خدا

مدّعا دل کا مرے شکر ہے اب برآیا

کوئی پیاسا نہ رہے آج یہ ہر اک سے کہا

سب تصدق ہیں مرے ہوش ودل جاں ان پر

میرے میخانے کی ہر چیز ہے قرباں ان پر