یاد_نبی کا گلشن مہکا_مہکا لگتا ہے

یاد نبی کا گلشن مہکا مہکا لگتا ہے

محفل میں موجود ہیں آقا ایسا لگتا ہے

نام محمد کتنا میٹھا میٹھا لگتا ہے

پیارے نبی کا ذکر بھی ہم کو پیارا لگتا ہے

لب پہ نغمے صل علیٰ کے ہاتھوں میں کشکول

دیکھو تو سرکار کا منگتا کیسا لگتا ہے

آنکھوں میں مازاغ کا کجلا سر طہٰ کا تاج

کیسے کہوں کملی والا ہم جیسا لگتا ہے

غوث قطب ابدال قلندر سب ان کے محتاج

میرا داتا ہر داتا کا داتا لگتا ہے

او ادنیٰٰ کی سیج سجی ہے عرش بریں پر آج

حق کا دلارا باندھ کے سہرا دولہا لگتا ہے

آؤ سنائیں اپنے نبی کو اپنے من کی بات

ان کے علاوہ کون نیازیؔ اپنا لگتا ہے