جب مری تشنہ_لبی نے دیکھ لی جوئے_علی

جب مری تشنہ لبی نے دیکھ لی جوئے علی

بھول کر سارے تکلف بڑھ چلی سوئے علی

جتنا جس میں ظرف ہو سیراب ہو سکتا ہے وہ

علم کا دریا ہے اک اک ذرہ کوئے علی

شاہ مرداں شیر یزداں اے مرے خیبر شکن

دیکھ کر دنیا پکاری چشم و ابروئے علی

زندگی بھر روشنی آنکھوں کی جا سکتی نہیں

خواب میں بھی دیکھ لے کوئی اگر روئے علی

قادری چشتی سہروردی کسی سے پوچھ لو

جس سے ہر خطہ ہوا سیراب ہے جوئے علی

کس لئے اپنے قدم رکھے زمیں پر وہ بھلا

جس کو حاصل ہو گئی ہو دولت موئے علی

کچھ نہ دیکھیں گے یہ دیوانے چلیں گے اس طرف

جس طرف تیرا اشارا ہوگا ابروئے علی

دشمنی اصحاب پیغمبر سے تو رکھتا ہے کیوں

یہ نہ کردار علی ہے اور نہ ہے کھوئے علی

ہند کی دھرتی کو اس کے قرب نے مہکا دیا

اک قلندر کو جو یاور مل گئی بوئے علی