شاہ_نواب کا دربار ہے روشن اتنا

شاہ نواب کا دربار ہے روشن اتنا

ہو نہیں سکتا ہے روشن کوئی درپن اتنا

دیکھ کر گھر شہ نواب کا جنت بولی

خوب صورت نہ ملے گا کوئی مسکن اتنا

اس میں بستا ہے یقیناً میرے شبیر کا چاند

ورنہ ہوتا نہیں روشن کوئی مدفن اتنا

ماہ و انجم کی یہاں بزم سجا کرتی ہے

وسعتیں رکھتا نہیں کوئی بھی آنگن اتنا

شکریہ اے شہ نواب کی پر نور گلی

مطمئن تھا نہ کبھی پہلے مرا من اتنا

شاہ نواب کا دامن ہے سمیٹے سب کو

مہرباں دیکھا نہیں دوسرا دامن اتنا

شاہ نواب کریں جتنا مریدوں پہ کرم

کھل کے برسا نہیں ہوگا کبھی ساون اتنا

ہوکے منسوب ترے در سے چمک اٹھا ہے

قابل قدر نہ تھا پہلے مرا فن اتنا

چھوڑ کر آنا پڑا اس کو وہیں پر یاورؔ

دل کو بھایا شہ نواب کا گلشن اتنا